Լուրեր

Լոկոռեգիոնար ցավազրկումը ցավային իմպուլսի տեղային ընդհատումն է՝ նյարդերի կամ նյարդային հյուսակների պաշարման եղանակով, և իրականացվում է ուլտրաձայնային հսկողության պայմաններում և/կամ նյարդախթանիչի կիրառմամբ:

Լոկոռեգիոնար անզգայացումն ապահովում է հիվանդի ներվիրահատական և հետվիրահատական փուլերում ցավազրկումը՝ խուսափելով նարկոտիկ ցավազրկողների անցանկալի կիրառումից, ինչը հնարավորություն է տալիս խուսափել շնչառական կենտրոնի ընկճումից, կանգից, փսխման ռեֆլեքսից, ճնշման անկումից:

Հետվիրահատական ցավի բացակայությունը նաև հնարավորություն է տալիս ավելի վաղ սկսել հետվիրահատական վերականգնումը, ինչի արդյունքում կանխարգելվում է թրոմբոէմբոլիկ բարդությունները, կանգային թոքաբորբի և պարկելախոցերի առաջացումը:

«Նաիրի» բժշկական կենտրոնում օրերս իրականացվել է լոկոռեգիոնար ցավազրկման կիրառմամբ հերթական վիրահատությունը:

75 տարեկան հիվանդի մոտ ախտորոշվել է աջ ծնկահոդի միջային մահիկի վնասում: Պլանավորվել է կատարել արթրոսկոպիա:

Նախավիրահատական շրջանում անեսթեզիոլոգի կողմից կատարված նախնական զննման արդյունքում պարզվել է, որ հիվանդը տառապում է մի շարք ուղեկցող ծանր քրոնիկ հիվանդություններով՝ հեպատիտ «C»-ով և լյարդի ցիռոզով պայմանավորված քրոնիկ լյարդային անբավարարություն, կերակրափողի երակների II աստիճանի վարիկոզ լայնացում, քրոնիկ սրտային անբավարարություն:

Ակնհայտ էր, որ ավանդական ողնուղեղային կամ ընդհանուր անզգայացումն անհնար էր:

Որոշվել է կատարել լոկոռեգիոնար անզգայացում` առանձին պերիֆերիկ նյարդերի պաշարումով:

Վիրահատությունն իրականացվել է պաշարումից 50 րոպե անց և տևել է 40 րոպե:

Վիրահատությունից 3 ժամ անց հիվանդը հենակի օգնությամբ քայլել է: Լոկոռեգիոնար պաշարումն ապահովել է նաև հետվիրահատական ցավազրկումը, իսկ հաջորդ օրը հիվանդը դուրս է գրվել լավ ինքնազգացողությամբ: