News

Կոնտրաստային մամոգրաֆիան կրծքագեղձերի հետազոտման ռենտգեն մեթոդ է, այն համարվում է կրծքագեղձի քաղցկեղի ախտորոշման զգայուն մեթոդներից մեկը: Իր զգայունությամբ գրեթե չի զիջում ՄՌՏ հետազոտությանը:

Հետազոտությունն իրականացվում է հետևյալ հերթականությամբ.

1. ներերակային եղանակով ներարկվում է յոդ պարունակող կոնտրաստային նյութ,
2. ստացվում են ստանդարտ պրոյեկցիաներով ռենտգեն նկարներ՝,
3. ընդհանուր հետազոտությունը տևում է մոտավորապես 15 րոպե:

Հետազոտության առավելությունները

● Հետազոտության հիմքում տարանջատվում է կրծքագեղձի նորմալ հյուսվածքը ախտաբանական օջախներից կամ գոյացություններից, տեսանելի դարձնելով կոնտրաստային նյութի կուտակումները:
● Գնահատվում է անոթային ցանցը. չարորակ գոյացություններում նորաստեղծ անոթային ցանցն առավել տեսանելի է դարձնում կոնտրաստանյութի կուտակումը:
● Կոնտրաստային մամոգրաֆիայի շնորհիվ հնարավոր է դիտարկել հայտնաբերված նորագոյացության բազմաօջախայնությունը և հստակեցնել չափերը:
● Հետազոտության շնորհիվ որոշ դեպքերում հնարավոր է խուսափել բիոպսիայից:

Ո՞ւմ է ցուցված կոնտրաստային մամոգրաֆիան

Այն պացիենտները, որոնց մոտ մամոգրաֆայի ժամանակ հայտնաբեվել են ախտաբանական օջախներ կամ նորմալ հյուսվածքում պնդացած զոնաներ, կատարվում է կոնտրաստային մամոգրաֆիա` կոնտրաստանյութի կուտակման շնորհիվ տարբերակելու բարորակ ու չարորակ փոփոխությունները:

Ինչպես՞ է որոշվում. բիոպսի՞ա, թե՞ կոնտրաստային մամոգրաֆիա:

Ուռուցքային հիվանդության ախտորոշման դեպքում, միանշանակ, կատարվում է բիոպսիա, կասկածելի դեպքերում նախընտրելի է նախապես կատարել կոնտրաստային մամոգրաֆիա:

Ո՞ւմ է հակացուցված կոնտրաստային մամոգրաֆիան

Կոնտրաստային մամոգրաֆիան հակացուցված է պացիենտներին, որոնց մոտ առկա են հետևյալ ուղեկցող հիվանդությունները.

● երիկամային անբավարարություն,
● վահանաձև գեղձի հիպերթիրեոզ,
● ալերգիա` յոդից:

Հակացուցված է նաև հղիներին և կերակրող մայրերին:

Կոնտրաստային մամոգրաֆիան ունի՞ տարիքային սահմանափակում
Կոնտրաստային մամոգրաֆիան տարիքային սահմանափակում չունի:

Ինչպե՞ս նախապատրաստվել հետազոտությանը:
Հարկ է նախքան հետազոտությունը որոշել կրեատինինի քանակն արյան մեջ:

Ցանկալի է հետազոտությունից առաջ երկու ժամ չսնվել` խուսափելու տոքսիկ ազդեցություններից:

Հետազոտությունից հետո՞…
Հետազոտությունից հետո խորհուրդ է տրվում մեծ քանակությամբ հեղուկներ օգտագործել` կոնտրաստանյութն օրգանիզմից արագ դուրս բերելու նպատակով: Հետազոտությունից ամիջապես հետո պացիենտը կարող է վերադառնալ առօրյա կյանքին:

Ստորև կներկայացվում է երկու դեպք.
1. առանց կոնտրաստանյութի ախտաբանական կուտակում, որը հաստատում է կասկածելի օջախի բարորակ լինելը,
2. կոնտրաստանյութի ախտաբանական կուտակում: