Ստամոքսի բարիատրիկ վիրահատություն (ստամոքսի փոքրացում)

Բարիատրիկ վիրաբուժությունը նախատեսված է այն պացիենտների համար, որոնց մոտ առկա է ճարպակալում, և սննդակարգի, ֆիզիկական ակտիվության կամ այլ ոչ վիրահատական մեթոդների միջոցով չի հաջողվել հասնել բավարար և կայուն արդյունքի կամ քաշի:

Կան բարիատրիկ վիրահատության տարբեր մեթոդներ։ Դրանցից տարածված են ստամոքսի երկայնական մասնահատումը (sleeve gastrectomy), որի ժամանակ հեռացվում է ստամոքսի զգալի մասը և ձևավորվում է նեղ, խողովակաձև ստամոքս, ինչպես նաև ստամոքսի շունտավորման տարբեր մեթոդները (gastric bypass), որոնց դեպքում փոփոխվում է նաև սննդի անցման ուղին։

Վիրահատության տեսակը չի ընտրվում միայն այն սկզբունքով, թե որքան քաշ է ցանկանում նվազեցնել պացիենտը։ Հաշվի են առնվում մարմնի զանգվածի ինդեքսը, տարիքը, ուղեկցող հիվանդությունները, սննդային սովորությունները, նախկինում իրականացված բուժումը և մի շարք այլ գործոններ։

Ե՞րբ են իրականացվում բարիատրիկ վիրահատությունները

Բարիատրիկ վիրահատության անհրաժեշտությունը գնահատվում է անհատապես։ Այն կարող է քննարկվել արտահայտված ճարպակալման դեպքում, հատկապես եթե ավելորդ քաշը կապված է առողջական այլ խնդիրների հետ։

Վիրահատության ցուցում կարող են լինել մարմնի զանգվածի բարձր ինդեքսը, ճարպակալման երկարատև ընթացքը, ոչ վիրահատական մեթոդներով քաշի կայուն նվազեցման անհաջող փորձերը, ինչպես նաև ճարպակալման հետ կապված հիվանդությունները՝ 2-րդ տիպի շաքարային դիաբետը, զարկերակային հիպերտենզիան, քնի օբստրուկտիվ ապնոէն, հոդերի գերբեռնվածության հետ կապված խնդիրները և նյութափոխանակության որոշ խանգարումներ։

Բարիատրիկ վիրահատության վերաբերյալ որոշումը կայացվում է բժշկական գնահատումից հետո։ Պացիենտը պետք է նաև պատրաստ լինի վիրահատությունից հետո փոխել սննդակարգն ու կենսակերպը և հետևել բժշկի հետագա ցուցումներին։

Բարիատրիկ վիրահատության հակացուցումները

Վիրահատությունը կարող է հակացուցված լինել կամ հետաձգվել, օրինակ, չվերահսկվող ծանր սիրտ-անոթային կամ շնչառական հիվանդությունների, ակտիվ վարակների, արյան մակարդելիության որոշ ծանր խանգարումների, հղիության, ինչպես նաև որոշ հոգեբուժական վիճակների կամ ալկոհոլային և թմրանյութային կախվածության դեպքում։

Ինչպե՞ս է իրականացվում ստամոքսի փոքրացման վիրահատությունը

Նախքան միջամտությունը պացիենտն անցնում է անհրաժեշտ հետազոտությունները։ Դրանք կարող են ներառել արյան և մեզի հետազոտություններ, ԷՍԳ, կրծքավանդակի և որովայնի համապատասխան հետազոտություններ, գաստրոսկոպիա և այլ հետազոտություններ՝ ըստ բժշկի ցուցման։ Անհրաժեշտության դեպքում իրականացվում են նաև սրտաբանի, էնդոկրինոլոգի և այլ մասնագետների խորհրդատվություններ։

Բարիատրիկ վիրահատությունները հիմնականում կատարվում են ընդհանուր անզգայացմամբ և լապարոսկոպիկ եղանակով։ Որովայնի պատին կատարվում են մի քանի փոքր կտրվածքներ, որոնց միջոցով ներմուծվում են տեսախցիկը և վիրաբուժական գործիքները։ Լապարոսկոպիկ մոտեցումը սովորաբար կապված է ավելի փոքր վիրահատական վնասվածքի և ավելի արագ հետվիրահատական վերականգնման հետ։

Բարիատրիկ վիրահատությունից հետո վերականգնումը

Վիրահատությունից հետո պացիենտը որոշակի ժամանակ գտնվում է բժշկի հսկողության ներքո։ Առաջին փուլում հատկապես կարևոր են վաղ ակտիվացումը, հեղուկների բավարար ընդունումը և բժշկի կողմից սահմանված սննդակարգի պահպանումը։

Սննդակարգը վերականգնվում է աստիճանաբար։ Սկզբնական շրջանում ընդունվում է հեղուկ սնունդ, այնուհետև՝ փափուկ և հետո արդեն սովորական կառուցվածք ունեցող սնունդ՝ փոքր չափաբաժիններով։ Այս փուլերի տևողությունը և սննդակարգը սահմանվում են անհատապես։

Բարիատրիկ վիրահատությունից հետո անհրաժեշտ է ոչ միայն նվազեցնել սննդի քանակը, այլև ձևավորել նոր սննդային սովորություններ։ Որոշ վիրահատություններից հետո կարող է անհրաժեշտ լինել վիտամինների, հանքանյութերի և այլ սննդային հավելումների ընդունում։ Պարբերական բժշկական հսկողությունը կարևոր է քաշի փոփոխությունը, սննդային վիճակը և ուղեկցող հիվանդությունների ընթացքը գնահատելու համար։

Բարիատրիկ վիրահատություն «Նաիրի» բժշկական կենտրոնում

«Նաիրի» բժշկական կենտրոնում բարիատրիկ վիրահատությունից առաջ իրականացվում է պացիենտի առողջական վիճակի համալիր գնահատում՝ վիրահատության ցուցումները, հնարավոր հակացուցումները և տվյալ պացիենտի համար համապատասխան մեթոդը որոշելու նպատակով։

Կենտրոնում հասանելի են անհրաժեշտ ախտորոշիչ հետազոտությունները, մասնագետների խորհրդատվությունները, վիրաբուժական բուժումը և հետվիրահատական հսկողությունը։ «Նաիրի» բժշկական կենտրոնում բարիատրիկ միջամտություններն իրականացվում են լապարոսկոպիկ եղանակով, որի շնորհիվ պացիենտները չեն ունենում հետվիրահատական բարդություններ, և շատ արագ վերադառնում են իրենց բնականոն կյանքին։

Եթե հետաքրքրում է բարիատրիկ վիրահատություն, ստամոքսի փոքրացում և տվյալ վիրահատության մասին ընդհանուր տեղեկատվություն, ապա կարող եք զանգահարել 8900 հեռախոսահամարին կամ այցելել Պարոնյան փողոց, 21 շենք: Ստամոքսի բարիատրիկ վիրահատության գինը ճշտելու համար անհրաժեշտ է դիմել «Նաիրի» բժշկական կենտրոն, քանի որ վերջնական արժեքը որոշվում է անհատապես։