Օնկոօրթոպեդիա

Փափուկ հյուսվածքների ուռուցքների բուժումը հանդիսանում է ժամանակակից օնկովիրաբուժության ամենաբարդ խնդիրներից մեկը: Այդ հիվանդության ախտորոշման գործում օգտագործվում է ժամանակակից ճառագայթային տեխնոլոգիաների ամբողջ համալիրը` ուռուցքի տեղային տարածման և ավշային համակարգի ախտահարման աստիճանը, ինչպես նաև հեռավոր թիրախ-օրգանների ախտահարումը ախտորոշելու նպատակով:

Ոսկրերի չարորակ նորագոյացությունների բուժումը իրենից ներկայացնում է ժամանակակից ուռուցքաբանության մեջ համեմատաբար նոր էջ: Ներկայումս զգալիորեն ընդարձակվել են ցուցումները օրգանապահպան վիրահատություններ կատարելու ուղղությամբ, որոնք թույլ են տալիս վերացնել գրեթե ցանկացած ոսկրահոդային դեֆեկտները և պահպանել ֆունկցիոնալ առումով լիարժեք վերջույթ, նույնիսկ տարածված ոսկրային ախտահարումների ժամանակ: Այսպիսով, ներկայումս հաշմող վիրահատությունները (ամպուտացիաները և էկզարտիկուլյացիաները) կատարվում են միայն այն ժամանակ, երբ անհնար է կատարել ուռուցքի արմատական հեռացում:

Ծառայության դիմող հիվանդների զգալի մասը՝ երեխաներ և երիտասարդ տարիքի պացիենտներ են, ինչը պայմանավորված է տվյալ տարիքում այս պաթոլոգիայի բարձր հաճախականությամբ։

Ներկայումս «Նաիրի» բժշկական կենտրոնի օնկոօրթոպեդիայի և ոսկրային ախտաբանության ծառայությունում կատարվում են բոլոր տեսակի վիրահատական միջամտությունները, որոնք կիրառվում են նման խնդիրներ դեպքում.

• Վերջույթների փափուկ հյուսվածքների ուռուցքների օրգանապահպան վիրահատական բուժում:
• Տարածուն փափուկհյուսվածքային ուոուցքների ժամանակ լայնածավալ և կոմբինացված միջամտություններ՝ առաջացած փափուկհյուսվածքային դեֆեկտների պլաստիկ վերականգնումով:
• Ներվիրահատական ուլտրաձայնային հետազոտություն՝ փափուկհյուսվածքային ուռուցքների մնացորդային հանգույցների հայտնաբերման նպատակով:
• Ոսկրերի բարորակ ուռուցքների և ուռուցքանման գոյացությունների վիրահատական բուժում՝ առաջացած ոսկրա-հոդային դեֆեկտների պլաստիկայով սեփական ոսկրի միջոցով և տարբեր տեսակների արհեստական ալլոտրանսպլանտատների օգտագործմամբ:
• Օստեոիդ-օստեոմայի ֆունկցիոնալ խնայողական վիրահատական բուժում նախավիրահատական ուռուցքի օջախի ԿՏ (համակարգչային տոմոգրաֆիա)-նշումով:
• Ոսկրերի չարորակ ուռուցքների վիրահատական բուժում` ախտահարված դեֆեկտների մասնահատմամբ և առաջացած ոսկրա-հոդային դեֆեկտների վերականգնումով՝ անհատական հոդային և դիաֆիզար էնդոպրոթեզների միջոցով:
• Ուռուցքների ժամանակ կոնքազդրային հոդի և ազդրոսկրի մասնահատում՝ անհատական էնդոպրոթեզավորմամբ:
• Ուռուցքների ժամանակ ծնկահոդի և ազդրոսկրի ստորին/ոլոքի վերին հատվածի մասնահատում և ծնկահոդի անհատական էնդոպրոթեզավորմամբ:
• Ուռուցքների ժամանակ ուսահոդի և բազկոսկրի մասնահատում հետագա անհատական էնդոպրոթեզավորմամբ:
• Ոսկրերի դիաֆիզար դեֆեկտների անհատական էնդոպրոթեզավորում:

Ծառայությունում կատարվում են նաև վիրահատություններ պլանային օրթոպեդիկ պաթոլոգիայի կապակցությամբ (էնդոպրոթեզավորում կոքսարթրոզի և գոնարթրոզի կապակցությամբ), ուղղիչ օստեոտոմիաներ ոտնաթաթի առաջին մատի դեպի դուրս թեքման ժամանակ (hallux valgus), օստեոպորոզի կոնսերվատիվ բուժում, ներհոդային հիալուրոնաթթվի ներարկում արթրոզների ժամանակ (viscosupplementation therapy):