logo
JCI GOLD SEAL
8900

Սրտանոթային ինտերվենցիոն կենտրոն

Սրտանոթային ինտերվենցիոն կենտրոն Երևանում

«Նաիրի» բժշկական կենտրոնում իր գործունեությունն է սկսել նորագույն տեխնոլոգիաներով հագեցած Սրտանոթային ինտերվենցիոն կենտրոնը՝ ընդլայնելով սրտանոթային և անոթային հիվանդությունների ախտորոշման ու նվազագույն ինվազիվ բուժման հնարավորությունները Հայաստանում։

Կենտրոնը համալրված է բժշկական տեխնոլոգիաների համաշխարհային առաջատարներից մեկի՝ Siemens Healthineers ընկերության Siemens ARTIS Genio անգիոգրաֆիկ համակարգով, որն առանձնանում է իր բազմաֆունկցիոնալ հնարավորություններով, առաջադեմ պատկերավորման տեխնոլոգիաներով և ինտերվենցիոն միջամտությունների իրականացման բարձր ճշգրտությամբ։

Ախտորոշման և բուժման նոր հնարավորություններ

Siemens ARTIS genio անգիոգրաֆիկ համակարգի տեխնոլոգիական կարևոր առանձնահատկություններից է ժամանակակից C-աղեղային կառուցվածքը, որը հնարավորություն է տալիս ընտրել պատկերավորման օպտիմալ դիրքեր և ապահովել անատոմիական կառուցվածքների մանրամասն տեսանելիություն բարդ ախտորոշիչ ու բուժական միջամտությունների ընթացքում։

Սարքը համալրված է մասնագիտացված ծրագրային լուծումներով, եռաչափ (3D) և քառաչափ (4D) պատկերավորման ու վերակառուցման հնարավորություններով, ինչպես նաև համակարգչային տոմոգրաֆիային համանման եռաչափ պատկերավորման տեխնոլոգիաներով (DynaCT)։

Համակարգի կարևորագույն առավելություններից է արհեստական բանականության վրա հիմնված առաջադեմ ծրագրային ապահովումը, որը հնարավորություն է տալիս ստանալ բարձր հստակության պատկերներ, իրականացնել դրանց մանրամասն մշակումն ու վերլուծությունը, ինչպես նաև համադրել հետազոտության տարբեր փուլերում ստացված պատկերային տվյալները։

Արհեստական բանականության տեխնոլոգիաների կիրառումը նպաստում է պատկերային աղմուկի նվազեցմանը, անոթների և անատոմիական կառուցվածքների առավել հստակ արտապատկերմանը, ախտաբանական փոփոխությունների հայտնաբերմանն ու գնահատմանը։ Այս հնարավորությունները հատկապես կարևոր են բարդ սրտանոթային և ներանոթային միջամտությունների պլանավորման, իրականացման և արդյունքների վերահսկման ընթացքում։

Siemens ARTIS Genio համակարգը համալրված է նաև մասնագիտացված առիթմոլոգիական ծրագրային փաթեթով, որը նախատեսված է սրտի ռիթմի խանգարումների հետ կապված ինտերվենցիոն միջամտությունների պատկերային ապահովման համար։ Այն հնարավորություն է տալիս առավել մանրամասն գնահատել սրտի անատոմիական կառուցվածքները, աջակցել էլեկտրաֆիզիոլոգիական հետազոտությունների և կաթետերային աբլացիոն միջամտությունների պլանավորմանն ու իրականացմանը՝ նպաստելով դրանց ճշգրտության և անվտանգության բարձրացմանը։

Պատկերների մշակման և միջամտությունների պլանավորման առաջադեմ ծրագրային գործիքները հնարավորություն են տալիս առավել ճշգրիտ գնահատել անոթների և սրտի կառուցվածքային առանձնահատկությունները, հայտնաբերել ախտաբանական փոփոխությունները և նպաստել միջամտությունների արդյունավետության ու անվտանգության բարձրացմանը։

Սրտանոթային և կառուցվածքային հիվանդությունների ինտերվենցիոն բուժում

Կենտրոնի տեխնիկական և ծրագրային հագեցվածությունը հնարավորություն է տալիս իրականացնել ախտորոշիչ և բուժական միջամտությունների լայն շրջանակ՝ ներառյալ՝

  • Սրտի կորոնար անոթների հիվանդությունների ախտորոշում և բուժում, այդ թվում՝ կորոնարոգրաֆիա, անգիոպլաստիկա և ստենտավորում։
  • Սրտի կառուցվածքային հիվանդությունների ինտերվենցիոն միջամտություններ՝ կիրառելով ժամանակակից պատկերային ուղղորդման և ներանոթային բուժման տեխնոլոգիաներ։
  • Սրտի ռիթմի խանգարումների ինտերվենցիոն ախտորոշում և բուժում՝ ներառյալ էլեկտրաֆիզիոլոգիական հետազոտությունների և կաթետերային աբլացիոն միջամտությունների պատկերային ուղղորդումը։
  • Պերիֆերիկ և այլ զարկերակային համակարգերի հիվանդությունների ախտորոշում ու բուժում, այդ թվում՝ անոթների լայնացում և ստենտավորում։
  • Անոթային էմբոլիզացիոն միջամտություններ՝ տարբեր ախտաբանական վիճակների բուժման նպատակով։
  • Բարորակ և չարորակ գոյացությունների էմբոլիզացիա՝ համապատասխան կլինիկական ցուցումների դեպքում, նպատակ ունենալով նվազեցնել գոյացությունների արյունամատակարարումը կամ իրականացնել մասնագիտացված ներանոթային բուժում։

Նվազագույն ինվազիվ մոտեցում՝ առավելագույն ճշգրտությամբ

Ինտերվենցիոն բժշկության ժամանակակից մեթոդները հնարավորություն են տալիս բազմաթիվ հիվանդությունների ախտորոշումն ու բուժումն իրականացնել առանց բաց վիրահատության՝ անոթային փոքր մուտքերի միջոցով։

Այս մոտեցումը համապատասխան դեպքերում կարող է նպաստել միջամտության հետ կապված վնասվածքի նվազեցմանը, հետվիրահատական վերականգնման արագացմանը և հիվանդանոցում գտնվելու տևողության կրճատմանը։

Siemens ARTIS Genio համակարգի բազմաֆունկցիոնալ հնարավորությունները, արհեստական բանականության վրա հիմնված պատկերների մշակման տեխնոլոգիաները, եռաչափ վերակառուցման մեթոդները և առիթմոլոգիական ծրագրային փաթեթը կարևոր նշանակություն ունեն հատկապես բարդ անատոմիական կառուցվածքների պատկերավորման, միջամտությունների ճշգրիտ պլանավորման և բուժման արդյունքների գնահատման համար։

Նոր հնարավորություններ՝ ժամանակակից բժշկության զարգացման ճանապարհին

Նորաբաց Սրտանոթային ինտերվենցիոն կենտրոնը կարևոր ներդրում է «Նաիրի» բժշկական կենտրոնի տեխնոլոգիական և մասնագիտական կարողությունների զարգացման գործում։

Սրտանոթային, կառուցվածքային, առիթմոլոգիական, պերիֆերիկ անոթային և էմբոլիզացիոն միջամտությունների իրականացման հնարավորությունների համադրումը մեկ կենտրոնում պայմաններ է ստեղծում բազմամասնագիտական համագործակցության և պացիենտների համալիր բուժման կազմակերպման համար։

Թարմացվել է՝

19 նոյեմբերի 2026, 10:17

Մեր սերտիֆիկատները