Լուրեր

«Միջողային աճառի ճողվածքի կապակցությամբ կատարվող վիրահատությունները սովորական բնույթ են կրում մեր աշխատանքում, սակայն առայսօր սև գույնի միջողային աճառի ճողվածքի չէինք հանդիպել:

Միջողային աճառը և նրա ճողվածքները լինում են սպիտակ, դեղին, դարչնամոխրագույն: Ստորև պատկերված է սովորական գույն ունեցող միջողային աճառի ճողվածքը, որը, սովորաբար, հանդիպում ենք վիրահատության ժամանակ:

Սակայն օրեր առաջ վիրահատության ժամանակ մենք զարմացած փորձում էինք բացատրություն տալ մեր տեսածին: Հիվանդի մոտ միջողային աճառի ճողվածքը սև գույն ուներ: Նման բան թե՛ մենք, թե՛ մեր գործընկերներն` այլ բուժհաստատություններից, չէինք հանդիպել:

Հետաքրքրաշարժ է, որ նախքան վիրահատությունը ՄՌՏ հետազոտությամբ որևէ արտառոց պատկեր չէր արձանագրել և ախտորոշվել էր միջողային աճառի ճողվածք, ինչը պատկերված է ստորև:

Համացանցում մենք գտանք ընդամենը երկու նմանատիպ նկարագրված դեպք, որոնցից մեկն արձանագրվել էր Թուրքիայում (2012թ.), իսկ մյուսը` Հնդկաստանում (2016թ.):

Սև գույնի միջողային աճառի ճողվածքը բացատրվում էր ալկապտոնուրիա հիվանդության դրսևորմամբ, որը հանդիպում է ազգաբնակչության 0.001%-ի մոտ և բացատրվում է հոմոգենտենզիոն թթվի ոչ լիարժեք տրոհման փաստով:

Նման հիվանդներին առանձնահատուկ բուժման ցուցումներ չկան: Խորհուրդ է տրվում երկարատև օգտագործել վիտամին C:

Նկարագրելով այս դեպքը՝ մենք ցանկանում ենք տեղեկացնել մեր գործընկերներին, որ եթե վիրահատության ժամանակ հանդիպեն սև գույնի ճողվածք, խուճապի չմատնվեն, նման բան հնարավոր է և դա, այսպես կոչված, ալկապտոնուրիա հիվանդության դրսևորումներից է:

Արման Հակոբյան,
Էնդոսկոպիկ նյարդավիրաբուժության և
ողնաշարի վիրաբուժության ծառայության ղեկավար
«Նաիրի» ԲԿ