ԷՍԳ (էլեկտրասրտագրություն)

Ի՞նչ է ԷՍԳ-ն և ինչի՞ համար է իրականացվում սրտի հետազոտությունը

Էլեկտրասրտագրությունը (ԷՍԳ) սրտի աշխատանքի ուսումնասիրման ամենատարածված, անվտանգ և տեղեկատվական մեթոդներից է։ Այն թույլ է տալիս գրանցել սրտի էլեկտրական ակտիվությունը և գնահատել սրտի աշխատանքը։ ԷՍԳ-ն լայնորեն կիրառվում է ինչպես սիրտ-անոթային հիվանդությունների ախտորոշման, այնպես էլ վերահսկման և կանխարգելման նպատակով։

Սրտի յուրաքանչյուր կծկում ուղեկցվում է էլեկտրական ազդակներով, որոնք տարածվում են սրտամկանով։ Էլեկտրասրտագրությունը գրանցում է այդ ազդակները հատուկ սարքի միջոցով և արտացոլում դրանք գրաֆիկական պատկերով՝ էլեկտրասրտագրի տեսքով։ Ստացված տվյալների հիման վրա բժիշկը կարող է գնահատել սրտի ռիթմը, կծկումների հաճախականությունը, հաղորդականությունը, ստանալ որոշ ինֆորմացիա սրտի սնուցման խանգարումների վերաբերյալ և այլ կարևոր ցուցանիշներ։

ԷՍԳ հետազոտությունը համարվում է սրտի առաջնային ախտորոշման մեթոդ և հաճախ հանդիսանում է հետագա մանրամասն հետազոտությունների հիմքը։

Ե՞րբ է ցուցվում ԷՍԳ հետազոտությունը

ԷՍԳ-ն կարող է նշանակվել ինչպես բժշկի ցուցումով, այնպես էլ կանխարգելիչ նպատակներով։ Այն հատկապես կարևոր է հետևյալ գանգատների դեպքում՝

• սրտխփոց, սրտի աշխատանքի անկանոնություն,
• կրծքավանդակի ցավ կամ ծանրության զգացում,
• շնչահեղձություն, հոգնածություն,
• գլխապտույտ կամ ուշագնացություն,
• զարկերակային բարձր ճնշում կամ դրա կտրուկ տատանումներ,
• սիրտ-անոթային հիվանդությունների կասկած կամ նախկինում հաստատված ախտորոշում։

ԷՍԳ հետազոտությունը հաճախ կիրառվում է նաև զարկերակային բարձր ճնշման դեպքում՝ սրտի վրա դրա ազդեցությունը գնահատելու նպատակով։ Բացի այդ, ԷՍԳ-ն պարտադիր է բազմաթիվ բժշկական զննումների ժամանակ՝ վիրահատությունից առաջ, հղիության ընթացքում, սպորտով ակտիվ զբաղվող անձանց մոտ, ինչպես նաև պարբերական կանխարգելիչ ստուգումների շրջանակում։

Ի՞նչ է ցույց տալիս ԷՍԳ-ն

Էլեկտրասրտագրությունը հնարավորություն է տալիս հայտնաբերել սրտի աշխատանքի տարբեր խանգարումներ, այդ թվում՝

• սրտի ռիթմի խանգարումներ (առիթմիաներ),
• հաղորդականության խանգարումներ,
• սրտամկանի հիպերտրոֆիա (սրտի մկանային շերտի հաստացում),
• սրտի իշեմիկ փոփոխություններ,
• սրտամկանի ինֆարկտի նշաններ (ներկա կամ նախկինում կրած),
• էլեկտրոլիտային խանգարումների անուղղակի նշաններ։

Չնայած ԷՍԳ-ն չի տալիս սրտի կառուցվածքային ամբողջական պատկեր, այն կարևոր գործիք է սրտի ֆունկցիոնալ վիճակը գնահատելու և վտանգավոր խանգարումները վաղ փուլում հայտնաբերելու համար։

Ինչպե՞ս է կատարվում ԷՍԳ հետազոտությունը

ԷՍԳ-ի իրականացումը պարզ, արագ և անցավ գործընթաց է։ Հետազոտությունը սովորաբար տևում է 5–10 րոպե։ Պացիենտը պառկում է հանգիստ վիճակում, իսկ բուժաշխատողը հատուկ էլեկտրոդներ է ամրացնում կրծքավանդակին, ձեռքերին և ոտքերին։ Էլեկտրոդները միացված են ԷՍԳ սարքին, որը գրանցում է սրտի էլեկտրական ակտիվությունը։

Հետազոտության ընթացքում կարևոր է պահպանել հանգիստ վիճակ, չշարժվել և չխոսել, որպեսզի գրանցումը լինի հնարավորինս ճշգրիտ։ ԷՍԳ-ն կարող է կատարվել ինչպես հանգստի վիճակում, այնպես էլ որոշ դեպքերում՝ ֆիզիկական ծանրաբեռնվածությանը զուգահեռ կամ դեղորայքային փորձով (ըստ բժշկի ցուցման)։

ԷՍԳ երեխաներին

ԷՍԳ հետազոտությունը լիովին անվտանգ է նաև երեխաների համար և կարող է իրականացվել ցանկացած տարիքային խմբում։ Երեխաների մոտ ԷՍԳ-ն կիրառվում է սրտի բնածին արատների, երբեմն նկատվող երկրորդային փոփոխությունների, ռիթմի խանգարումների, ինչպես նաև ֆիզիկական ծանրաբեռնվածությանը սրտի արձագանքը գնահատելու համար։ Հետազոտության ընթացքը նույնն է, պարզապես բժշկական անձնակազմը հատուկ ուշադրություն է դարձնում երեխայի հարմարավետությանը և հանգիստ վիճակին։

ԷՍԳ արդյունքների վերլուծություն

ԷՍԳ արդյունքների ճիշտ գնահատումը իրականացվում է միայն բժշկի՝ առավել հաճախ սրտաբանի կողմից։ Վերլուծության ընթացքում մասնագետը գնահատում է սրտի ռիթմը, հաճախականությունը, էլեկտրական առանցքը, ալիքների և միջակայքների ձևը և տևողությունը։

ԷՍԳ եզրակացությունը կարող է ներառել ինչպես նորմայի սահմաններում գտնվող տվյալներ, այնպես էլ տարբեր աստիճանի շեղումներ։ Կարևոր է նշել, որ ԷՍԳ-ում հայտնաբերված փոփոխությունները միշտ պետք է գնահատվեն համադրելով պացիենտի գանգատների, կլինիկական պատկերի և այլ հետազոտությունների արդյունքների հետ։ Անհրաժեշտության դեպքում բժիշկը կարող է առաջարկել լրացուցիչ հետազոտություններ՝ օրինակ Էխոսրտագրություն կամ Հոլտեր մոնիթորինգ։

Որտե՞ղ կարելի է կատարել ԷՍԳ Երևանում

ԷՍԳ հետազոտությունը Երևանում կարող եք կատարել «Նաիրի» բժշկական կենտրոնում, որտեղ այն իրականացվում է ժամանակակից սարքավորումներով և փորձառու մասնագետների կողմից։ Կենտրոնում ապահովվում է ԷՍԳ-ի արագ իրականացում, արդյունքների ճշգրիտ վերլուծում։

Գրանցվելու համար կարող եք զանգահարել 89 00 հեռախոսահամարին կամ այցելել «Նաիրի» բժշկական կենտրոն՝ Պարոնյան 21 հասցեով։