Համակարգչային տոմոգրաֆիա

ՀՏ հետազոտության արժեքը կախված է հետազոտվող անատոմիական շրջանից, հետազոտության ծավալից և կոնտրաստային նյութի կիրառման անհրաժեշտությունից։ Տարբեր արժեքներ կարող են սահմանվել գլխուղեղի, թոքերի, որովայնի խոռոչի, ողնաշարի, անոթների կամ մի քանի հատվածների ՀՏ-ի համար։ Արժեքը ճշտելու համար սովորաբար անհրաժեշտ է նշել, թե կոնկրետ որ շրջանի հետազոտությունն է նախատեսվում։  Արժեքը կարող է տատանվել 20.000դր-ից մինչև 120.000դր-ի միջակայքում։

Այո՝ ՀՏ հետազոտության համար ուղեգիրը անհրաժեշտ է, քանի որ այն օգնում է հստակեցնել հետազոտության նպատակը, հետազոտվող շրջանը և կոնտրաստավորման անհրաժեշտությունը։

Համակարգչային տոմոգրաֆիան օգտագործում է ռենտգենյան ճառագայթում, ուստի հետազոտությունը նշանակվում է բժշկական ցուցումով։ Ժամանակակից սարքավորումները և արձանագրությունները թույլ են տալիս ընտրել հետազոտության նպատակի համար անհրաժեշտ նվազագույն ճառագայթային դոզան։ Հետազոտության նպատակահարմարությունը յուրաքանչյուր դեպքում գնահատում է բժիշկ-ռադիոլոգը։

ՀՏ հետազոտությունը սովորաբար տևում է մի քանի րոպե, իսկ ամբողջ այցը՝ նախապատրաստմամբ և կազմակերպչական փուլերով, կարող է փոքր-ինչ երկարաձգվել։ Եթե կիրառվում է կոնտրաստային նյութ կամ կատարվում է բազմափուլ հետազոտություն, ընդհանուր տևողությունը կարող է ավելանալ։ Բուն սկանավորումը սովորաբար կարճ է, սակայն կարևոր է հետազոտության ընթացքում պահպանել անշարժություն։

Երեխաների ՀՏ հետազոտությունը կատարվում է միայն բժշկական ցուցումով, երբ անհրաժեշտ է արագ և հստակ պատկերային գնահատում։ Երեխաների դեպքում հատկապես կարևոր է նվազեցնել ճառագայթային ծանրաբեռնվածությունը և ճիշտ ընտրել հետազոտության ծավալը։ Հետազոտության անհրաժեշտությունը, ձևաչափը և հնարավոր սահմանափակումները որոշվում են բժշկի կողմից՝ հաշվի առնելով երեխայի տարիքը, վիճակը և կլինիկական խնդիրը։

Այո, բժշկական ցուցումների առկայության դեպքում կարող է իրականացվել նաև կոնտրաստավորմամբ ՀՏ հետազոտություն։ Կոնտրաստային նյութը կիրառվում է որոշ օրգանների, անոթների, ուռուցքային կամ բորբոքային փոփոխությունների ավելի հստակ գնահատման և տարբերակիչ ախտորոշում իրականացնելու համար։ Նախքան հետազոտությունը կարող է պահանջվել լրացուցիչ տվյալների գնահատում, այդ թվում՝ ալերգիկ պատմության, երիկամների ֆունկցիայի և ուղեկցող հիվանդությունների վերաբերյալ տեղեկություն։

ՀՏ հետազոտության հաճախականությունը սահմանվում է ըստ բժշկական անհրաժեշտության, քանի որ մեթոդը կապված է ճառագայթային բեռնվածության հետ։ Կրկնակի հետազոտությունները նշանակվում են միայն այն դեպքում, երբ դրանք անհրաժեշտ են ախտորոշման, դինամիկ հսկողության կամ բուժման արդյունքների գնահատման համար։ Որոշումը կախված է հետազոտության տեսակից, հետազոտվող շրջանից և նախորդ ՀՏ-ների պատմությունից։

ՀՏ հետազոտության արդյունքների պատրաստ լինելու ժամկետը կախված է հետազոտության ծավալից, բարդությունից և նկարագրության ընթացակարգից։ Սովորաբար պատկերները և բժշկական եզրակացությունը տրամադրվում են սահմանված ժամկետում՝ նույն օրը կամ ավելի ուշ։ Եթե կատարվել է բազմափուլ կամ կոնտրաստավորմամբ հետազոտություն, կամ անհրաժեշտ է արդյունքների ավելի մանրամասն վերլուծություն, ապա  արդյունքների տրամադրումը կարող է ավելի երկար տևել։

ՀՏ հետազոտության արդյունքները վերուծում և նկարագրում է ճառագայթաբան բժիշկը։ Նա գնահատում է ստացված շերտային պատկերները, նշում հայտնաբերված փոփոխությունները և կազմում եզրակացություն։ Վերջնական կլինիկական մեկնաբանությունը սովորաբար կատարում է բուժող բժիշկը՝ համադրելով ՀՏ տվյալները գանգատների, զննման և այլ լաբորատոր կամ գործիքային հետազոտությունների արդյունքների հետ։

Կոնտրաստով ՀՏ-ից առաջ անհրաժեշտ է արյան կրեատինինի քննություն՝ երիկամների ֆունկցիան գնահատելու համար։ Սա հատկապես կարևոր է, եթե պացիենտն ունի երիկամային հիվանդություն, շաքարային դիաբետ, տարեց է կամ առկա են այլ գործոններ, որոնք կարող են ազդել կոնտրաստային նյութի անվտանգ կիրառման վրա։ Քննության անհրաժեշտությունը որոշվում է ըստ հետազոտության տեսակի և պացիենտի առողջական վիճակի։